اخر اللقية طلعت سود ... يمنية صنعانية ... جميلة جداً
اخر اللقية طلعت سود (الكنز طلع فحم)
هذه مثل كثير نسمعه في صنعاء بس الان اديلكم قصة الحقيقة
يقوال لنا الكبرا حقنا الاباء والاجداد قصة اللقية اللي طلعت سود
انه في في احد بيت صنعاء القديمة
في بيت واحد اسمه الحاج عبد المغني
ذات يوم حلم في المنام انه تحت بيته يوجد لقية دست مليان ذهب (صندوق مليان ذهب)
وانه يحرسه جني بصورة حيه (ثعبان) وهو حارس اللقية هذه وسمع صوت يقول اذا تشتي حارس الللقية
يرحله من عند الدست عليك ان تقطع اصبعك الصغيرة
الحاج عبد المغني صحي من النوم على صوت اذان الفجر
خرج صلى في الجامع الكبير حق صنعاء القديمة
وقري شويه قراءن
وبسر الامام حق الجامع الكبير وقال اسائله ايش قصة الاصبع الصغيرة
قام الحاج عبد المغني الى عند الامام وقال السلام عليكم يا امام
رد عليه الامام وعليكم السلام ورحمة الله وبركاته كيف انت يا حاج عبد المغني
قال والله يا علامة اني اشتي اسألكم حاجه بسرته في المنام واشتي اعرف ايش هي
قال العلامة تلكلام
قال اشتي اعرف الاصبعي الصغيرة ايش هي يا علامة
ضحك العلامة شويه وقال ايش يا حاج عبد المغني قد بسرت لقية تحت البيت حقك
او ايش الحاج عبد المغني استغرب من العلامة
وقال ايش دراكم يا علامة قال العلامة ما سمعت قصة اللقية طلعت سود
قال لا والله يا علامة ايش هي
قال اسمع يا حاج عبد المغني
انا كنت كاتب عند الشيخ العلامة الله رحمه شيخنا الكبير
وكنت اتعلم منه كل حاجه
وذا بيوم جاء الينا واحد قبيلي من خارج صنعاء
ودخل الجامع وصلى وجلس مورع ( منتظر ) للشيخ الكبير حق صنعاء
لما يخلص الدرس في الحلقه
خلص الشيخ الكبير حق صنعاء الدرس
القبيلي وصل وسلم على الشيخ الكبير حقنا وقال انا جيت من خارج صنعاء اسال في حاجه
ايش معنى اصبعي الصغيرة في لغة الجن
قال هي على ما اضن انه الابن الصغير
قال هكذا
قال العلامة ليش بتسال
قال بس واحد تحداني اعرف كلمة من لغة الجن
قال العلامة ابوه تصدق
قال هي تحدي على بقرة
قل العلامة الكبير انا حذرتك وابريت ذمتي
القبيلي حب يد العلامة وقال له الله يجزيكم الخير
القبيلي
روح البلد حقهم
وجاء الليل عليه وخرج واخذ المفرس ( الفأس)
والى جوار البيت حقه كان به شجرة كبيرة
قام يحفر تحت الشجرة وحفر غرقه عميقة
ووجد صندوق اسود
واذاقدو بدأ ياخذه خرجت له حيه
كبيرة قوي القبيلي هرب خوف
ورجع البيت وهو خائف مفتجع
قال الحيه طلعت صدق
يعني االاصبع الصغيرة هي ابني الصغير
اخذا ابنه الصغير واخذ معه سكينه
وشله الى عند الحفرة وذبح ابنه وخل الدم يسير الى داخل الغرقه
الحيه بسرت الدم شربت منه
والقبيلي بسر الحيه راحت لها
نزل اخذ الصندوق الكبير وهو ثقيل شويه
واخذه الى غرفه مستقله خارج البيت
القبيلي نسي الولد حقه
ورجع وهو فارح لانه لقي هذا الصندوق
طلع الفجر والقبيلي كسر الصندوق
وطلع اللي دخل الصندوق سود ( فحم اسود)
القبيلي صيح ( صرخ ) ابني وراح وبسر الغرقه ما عاد حصل ابنه
القبيلي جنن وطار عقله
وجلس يصيح قطعت اصبعي الصغيرة وطلعت اللقية سود
وانا يوم بالصدفه مشيت الى بلد هذا القبيلي اخذ حاجه من هناك
للعلامة الشيخ حقي
وبسرت القبيلي اللي سال هذاك اليوم
وهو قدو مجنون وبيقول قطعت اصبعي الصغيرة وطلعت اللقية سود
ورجعت الى عند العلامة حقي وقلت القصة وايش شفت وقصة القبيلي اللي سال
قال العلامة ان لله وان اليه رجعون
وهذه يا حاج عبد المغني هي القصة كلها
انتبه تسوي زي القبيلي وتخسر ابنك وعقلك وتدخل النار
