الزواج المبكر .. باللهجة

مبخوت العزي الوصابي

ليش البنات بيتزوجين وعاد اعمارهن ما توصلش ستا عشر سنة ؟
ليش هذا الزواج المبكر ؟
تشتوا الصدق.. حرام عليكم يا أولياء الأمور ؟
لا تظلموش البنات .
لوما ناش داري بكم عاد اقول كلكم بيحب الفلوس وبيكره البنات!
أنا داري مش صح هذا الكلام ليكن نفسى ادرى ليش بتزوجهن وعادهن جهال ؟
ليش مستعجلين عليهن هكذا ؟
انتو دارين ان الزواج المبكر هذا مش لصالح البنت بيضرها اكثر مما ينفعها وبيضر بيتها واولادها
لا هي اللي ارتاحت وشبت سوا ، ولا هي اللي قدرت تربي اولادها ؛ لانها جاهلة ما بش معها خبرة في التربية ..
عادها تشتي من يربيها وانتو تشتوها تربي اطفال !
وبعدا ياريت وانتو تعرفوا تربوا صح !
بيوصل عمرها خمستاعش ولا ستاعشر سنة وتزوجوها وانتوا ولا في حسكم وين باتروح وايش بايحصل لها لا حملت ولا ولدت !
لا الأم تقل لها ايش تسوي ولا أبوها شايف الحكايه تخصه !
طيب .. كيف عا تعرف وانتوا دارين ان البنات يخزين يسألين عن أي حاجة وتوصل عند عمتها يعني حماتها وانها تشتيها فاهمة كل شي ؟
يا خلق الله البنات مش صح نزوجهن وعادهن صغار ؟
انا داري لو انتو بتدرسوهن ما عا تقدروا تزوجهن الا وقد هن فوق ثمنتاعشر سنة
يعني بعدما يتخرجين من الثانوية ولو عادكم با تدرسوهن جامعة ما عا تقدروا تزوجوهن الا وقد هن فوق اثنين وعشرين سنة .
ليكن بتحرموهن من الدراسة ولما تبلغ البنت وتوصل خمستاعشر سنة بتبصروها حق زواج
ما يجي خاطبي يشتي يخطبها الا وقلتوا له اهلا وسهلا
ليكن لو هن تدرسين عاتقولوا للخاطبي عادها تدرس بعدما تخلص يقع خير ..
ولا به احراج ولا هم يحزنون .