الإنسان اليمني .. حاضره وماضيه " باللهجة "
بقلم : مبخوت العزي الوصابي
لو بانتحاكى عن اليمني فهو انسان عربي مثله مثل الخليجي والشامي والعراقي والمصري والمغربي والسوداني عايش في بلاد مثلها مثل غيرها من البلدان الثانية ، يعني مابش اختلاف خيرات بين البلاد العربية.. كلها تقع في منطقة لا هي باردة ولاهي حامية .. وكل بلاد فيها جبال وفيها صحاري وفيها سهول وقيعان .. وجو هذي المناطق مش سوا هانا وِلَّا هاناك ؛ به حمى وبه برد وبه مناطق يوقع مطر خيرات ومناطق ما بش .. ومناطق ها وها ؛ يعني لا باس ، نص نص .
وقصدي من هذا الكلام كله ان ثقافة العرب وعاداتهم وتقاليدهم متقاربة شويه من سب المناخ متقارب كما قلنا وشي ثاني اللغة واحده واكثرهم مسلمين يعني الدين واحد حتى المسيحيين ولا اليهود هم اصحاب ديانات سماوية وهذا الشى خلى عاداتهم وتقاليدهم مش مختلفة زيادة على المسلمين .
ليكن هذا الكلام ما قصديش ان ما بش اختلاف بين العرب .. به اختلاف بس هذا الاختلاف اغلبه بالاسلوب اما العادات هن نفسهن فاليمني يحتفل بالزواج والاعياد وبالمولود الجديد مثله مثل غيره لكن البعد بين المناطق وخاصة زمان حين ما كان بش مواصلات واتصالات مثل ذلحين ذيه البعد خلا الناس يعيشوا حياتهم وحدهم وحدهم وانت داري ان العادات والتقاليد هي تجي مع الايام وتتغير مع الايام فكان الناس اللي قريبين من بعض عاداتهم وتقاليدهم واحدة ما تختلفش بس هولا الناس اللي عاشوا مع بعض كونوا قبيله واللي هناك كونوا قبيله وهكذا تكونين القبايل ساعما تقل تجمعات صغيره كبرت وان قدهن قبايل وبعدا هولا الناس فرضت عليهم الظروف اعراف وقواعد ساع القوانين بيحترموها ويعاقبوا اللي يخالفها وان كان به قوانين للدولة اللي هم فيها هذي تسير على حالها والاعراف تسير على حالها ولو تشوف في اليمن وهي دوله واحدة با تتشوف طرق مختلفة اللي بيشوفها بيقول انهن مناسبات مختلفة وهن نفس العادات ونفس المناسبات بس كل قبيلة لها اسلوب يعني هي ذك هي ما بش اختلاف اللهم الاسلوب مختلف بس .
هذا كله وانت في اليمن وعاتشوف الكلام نفسه في الدول الثانية واللي اشتي اقوله هانا ان البيئة والمناخ بتاثر قوي على الانسان ولغته وحياته بكلها فتحصل الناس في الصحاري شديدين قوي يعني فيهم جلافة يا لطيف واللي بالسواحل تحصلهم مش هكذا ، سير شوف التهاميين عتلاقيهم لطاف قوي واللي بالجبال متأثرين بالجبال وبالخضرة في شدة بس مع الشدة تلاقي كيف اقول لك ؟! تلاقي مشاعرهم حساسة حق شعر وشعرهم رقيق وعاطفي .. حق فن يعني .. من سب الخضرة والمناظر والطبيعة .. ومن زمان نسمع الناس تقول هذا الكلام والمؤرخين كتبوا كتب كثيرة وكلامهم متقارب . المهم يا عزيزي به أشياء خيرات هِي اللي تأثر على العادات والتقاليد مش بس الطبيعة ولا الجو ساعما قلت أوَّل .. به الدين وبه المدينة وبه الاحداث واليوم التكنولوجيا له تأثير قوي على العادات والتقاليد واللغة والثقافة بشكل عام .
واشتي اقول لك شي قبلما اخلص كلامي ، اليمن موقعه الجغرافي خلاه ثقافته بعيدة من الاحتكاك بالثقافات الثانية وهذي النتيجة اللي هي البعد وعدم الاحتكاك اقتلبت سبب وخلت الانسان اليمني يحس انه مختلف شويه او بعيد شويه عن العرب الثانيين فظل متمسك بثقافته وكانه بيحافظ على هويته دريت كيف ؟ وزاد الانغلاق كمل الناقص فهو من ناحيه تمام خلانا اليمنيين نحافظ على ثقافة قديمة وبنفس الوقت خلانا للاسف في عيون بعض الناس عرب ولا اجانب بدائيين وبعضهم بيخزى ولا يشتي يقول متخلفين وبدو وكننا نعيش خارج التاريخ ..
بس .. مش مشكلة عا يسبرها ربك وما يكون الا خير ..
والفتى من قال انا .. صحيح اليمنيين من اول الناس اللي عرفوا المدنية والحضارة والتاريخ يشهد وكلنا نفتخر باصلنا واجدادنا فعلوا جهدهم ما قصروش سووا اللي يبيض الوجه ..بس ما فادنا نجلس نتفاخر بهم وننسى انفسنا .. لو نفعل بس ربع ما فعلوا ان احنا رجال قدروا يسووا اكثر من اللي سويناه اليوم وما كان بش معاهم شي ما ذلحين قد كل شي موجود مواصلات اتصالات كهرباء تكنولوجيا ولو نجي نشوف ما بش شي سويناه احسن من اللي سووه بجهود بسيطة ومتواضعة ..
ما اشتيش اقول ذُريًّة خاربة !! الله يصلحها بس !
خاطرك
